پی ٹی آئی نے ڈاکٹر عارف علوی کو صدارتی امیدوار نامزد کر دیا

0 61

پاکستان میں حکمران جماعت پاکستان تحریک انصاف نے ڈاکٹر عارف علوی کو ملکی صدر کے عہدے کے لیے امیدوار نامزد کر دیا ہے۔ یہ اعلان پی ٹی آئی کے ترجمان فواد چوہدری نے اپنی ایک ٹویٹ میں کیا۔

اپنے ایک اور ٹوئٹر پیغام میں فواد چوہدری نے لکھا کہ نومنتخب وزیر اعظم عمران خان نے 20 رکنی ملکی کابینہ کی منظوری دے دی ہے، جس میں پندرہ وفاقی وزیر اور پانچ مشیر شامل ہوں گے۔



بعد میں فواد چوہدری نے ٹوئٹر پر ہی وفاقی کابینہ کے لیے نامزد کردہ وزراء کی وہ فہرست بھی جاری کر دی، جس کے مطابق سینیٹر فروغ نسیم کو قانون اور انصاف کی وزارت دی جائے گی۔ چوہدری طارق بشیر چیمہ سرحدی علاقہ جات کے وزیر ہوں گے، نورالحق قادری کو وزارتِ مذہبی امور کا قلم دان سونپا جائے گا، ڈاکٹر شیریں مزاری کو انسانی حقوق کی وزارت دی جائے گی جب کہ غلام سرور خان کو پٹرولیم کی وزارت سونپی جائے گی۔ تحریک انصاف کے ترجمان فواد چوہدری کو نئی پاکستانی کابینہ میں وزارتِ اطلاعات و نشریات کا قلم دان دیا جائے گا۔

زبیدہ جلال نئی پاکستانی حکومت میں دفاعی پیداوار کے شعبے کی وزیر ہوں گی جب کہ عامر محمود کیانی صحت کے وفاقی وزیر کے طور پر ذمہ داریاں انجام دیں گے۔



پاکستان تحریک انصاف کے سینیئر رہنما اور ماضی میں پاکستان پیپلز پارٹی کے دورِ حکومت میں وزیر خارجہ کے بہ طور خدمات انجام دینے والے شاہ محمود قریشی نئی حکومت میں بھی وزیرخارجہ ہی ہوں گے۔ اس حکومت میں وزارت خزانہ کا قلم دان اسد عمر کے حوالے کیا جائے گا۔

ماضی میں وزیر ریلوے کے بہ طور کام کرنے والے شیخ رشید احمد کو اس حکومت میں بھی وزارت ریلوے تفویض کی گئی ہے۔

حکومت کی اتحادی جماعت ایم کیو ایم کے رہنما خالد محمود صدیقی اس حکومت میں انفارمیشن ٹیکنالوجی کے وفاقی وزیرہوں گے۔



نئی حکومت میں فہمیدہ مرزا بین الصوبائی رابطہ کاری کی وزارت سنبھالیں گی اور شفقت محمود پیشہ ورانہ تربیت کی وزارت کے سربراہ ہوں گے۔

یہ بات اہم ہے کہ نئی حکومت میں وزارت داخلہ عمران خان نے اپنے پاس ہی رکھی ہے، یعنی یہ قلم دان کسی کے سپرد نہیں کیا گیا۔

نئی کابینہ میں محمد شہباز ارباب اسٹیبلشمنٹ، عبدالرزاق داؤد کامرس، ٹیکسٹائل اور صنعت، ڈاکٹر عشرت حسین، انسٹیٹیوشنل ریفارمز، امین اسلم ماحولیاتی تبدیلیوں اور ظہیرالدین بابر پارلیمانی امور سے متعلق وزیر اعظم کے مشیر ہوں گے۔


سوہنی دھرتی ایک غیر منافع بخش ادارہ ہے۔ ہماری صحافت کو سرکاری اور کارپوریٹ دباؤ سے آزاد رکھنے کے لیے مالی تعاون کیجیئے

جواب چھوڑیں

آپ کا ای میل ایڈریس شائع نہیں کیا جائے گا.

This site uses Akismet to reduce spam. Learn how your comment data is processed.